Հասարակագիտության առաջադրանքներ․ Հոկտեմբերի 19-23.

  • Ինչի՞ մասին է հասարակագիտություն առարկան։ Ինչպիսի՞ հասարակական ոլորտներ է ընդգրկվում նրա մեջ։ Ի՞նչ ոլորտներ կավելացնեիք դուք: Հասարակագիտությունը գիտություն է, որն ուսումնասիրում է հասարակությունը, մարդկանց փոխհարաբերությունները, իրավունքներն ու պարտականությունները, հասարակական կյանքը և պետության գործունեությունը։ Այն օգնում է հասկանալ, թե ինչպես է կազմակերպված հասարակությունը, ինչպես են մարդիկ համագործակցում և ինչ դեր ունեն հասարակության զարգացման գործում։ Ոլորտներ՝ քաղաքական, տնտեսական, սոցիալական, մշակութային, իրավական: Ես կավելացնեի բնապահպանական ոլորտը։ Բնապահպանական ոլորտը կարևոր է, քանի որ վերաբերում է բնության պահպանությանը և շրջակա միջավայրի խնդիրներին։
  • Ի՞նչ է գեղագիտությունը։ Ինչքանո՞վ է կարևոր գեղագիտությունը մեր կյանքում: Գեղագիտությունը ուսումնասիրում է գեղեցիկը, արվեստը, մարդու գեղագիտական ճաշակը և գեղեցկությունն ընկալելու կարողությունը։ Այն օգնում է մեզ նկատել ու գնահատել գեղեցիկը ոչ միայն արվեստում, այլև բնության, մարդկանց և առօրյա կյանքի մեջ։ Այն օգնում է մեզ ավելի գեղեցիկ դարձնել մեր շրջապատը, ճիշտ ընտրություններ կատարել հագուստի, արտաքին տեսքի և միջավայրի հարցում։
  • Ի՞նչ է բարոյագիտությունը։ Ինչպե՞ս եք կարողանում բարոյագիտությունից ստացած գիտելիքները կիրառել կյանքում: Բարոյագիտությունը գիտություն է բարոյականության, մարդու վարքագծի, արժեքների և հասարակության մեջ ընդունված ճիշտ ու սխալ արարքների մասին։ Այն սովորեցնում է լինել ազնիվ, հարգալից, պատասխանատու, արդար և հոգատար մարդկանց նկատմամբ։ Բարոյագիտությունից ստացած գիտելիքները կիրառում եմ առօրյա կյանքում՝ հարգելով շրջապատիս ցանկությունները, որոշումները, կարծիքները, օգնելով նրանց, ովքեր դրա կարիքն ունեն, ընդունելով իմ սխալները, և դրանց վրա սովորելով:
  • Ի՞նչ է հոգեբանությունը և ի՞նչ է ուսումնասիրում այն։ Կյանքի որ ոլորտներին է հատկապես վերաբերում այս գիտությունը։ Հոգեբանությունը ձեզ առավել շատ հետաքրքրում է որպես գիտություն, թե՞ հմտությունը․ հիմնավորե՛ք ձեր պատասխանը: Հոգեբանությունը գիտություն է, որն ուսումնասիրում է մարդու հոգեկան աշխարհը, մտածողությունը, զգացմունքները, վարքագիծը, բնավորությունը և մարդկանց փոխհարաբերությունները։ Այն օգնում է հասկանալ, թե ինչու են մարդիկ տարբեր իրավիճակներում տարբեր կերպ մտածում, զգում և գործում։ Հոգեբանությունը վերաբերում է կյանքի գրեթե բոլոր ոլորտներին՝ ընտանիքին, ընկերությանը, կրթությանը, աշխատանքին, հասարակական հարաբերություններին և անձնական զարգացմանը։ Ինձ հոգեբանությունը շատ է հետաքրքրում թե՛ որպես գիտություն, թե՛ որպես հմտություն։ Ես շատ եմ սիրում այս ոլորտը, շատ եմ կարդում հոգեբանական գրքեր, քանի որ ինձ հետաքրքիր է ուսումնասիրել մարդկանց մտածելակերպը, հասկանալ նրանց զգացմունքներն ու վարքագծի պատճառները։ Ինձ դուր է գալիս նաև մարդկանց լսելն ու փորձել հասկանալ նրանց ներաշխարհը։ Հոգեբանությունն ինձ այնքան է հետաքրքրում, որ նույնիսկ դիտարկում եմ այն որպես իմ ապագա մասնագիտություն։
  • Ի՞նչ է տնտեսագիտությունը։ Ի՞նչ գիտեք փողի, շուկայի և շուկայական հարաբերությունների մասին։ Տնտեսագիտությունը գիտություն է, որն ուսումնասիրում է մարդկանց տնտեսական գործունեությունը, ապրանքների և ծառայությունների արտադրությունը, բաշխումը, փոխանակումն ու սպառումը։ Այն օգնում է հասկանալ, թե ինչպես են մարդիկ, կազմակերպություններն ու պետությունները տնօրինում իրենց ունեցած սահմանափակ միջոցները՝ իրենց կարիքները բավարարելու համար։ Փողը ապրանքների և ծառայությունների դիմաց վճարելու միջոց է։ Այն հեշտացնում է առևտուրը, օգնում է խնայել և կատարել տարբեր ֆինանսական գործարքներ։ Շուկան այն միջավայրն է, որտեղ հանդիպում են ապրանքների և ծառայությունների գնորդներն ու վաճառողները։ Այն կարող է լինել ինչպես իրական տարածք, օրինակ՝ խանութ կամ շուկա, այնպես էլ առցանց հարթակ։ Շուկայական հարաբերությունները գնորդների և վաճառողների միջև ձևավորվող տնտեսական հարաբերություններն են։ Դրանք հիմնված են պահանջարկի, առաջարկի, գների և մրցակցության վրա։ Օրինակ՝ երբ որևէ ապրանքի պահանջարկը մեծանում է, իսկ առաջարկը չի բավարարում, դրա գինը կարող է բարձրանալ։
  • Որպես հինգերորդ բաժին, ի՞նչ կավելացնեիք դուք 10-րդ դասարանի համար։ Ես որպես հինգերորդ բաժին կավելացնեի ինքնաճանաչումն ու անձի զարգացումը։ Կարծում եմ՝ 10-րդ դասարանի աշակերտների համար այս թեման շատ կարևոր է, քանի որ դեռ փորձում ենք ճանաչել ինքներս մեզ, հասկանալ մեր հետաքրքրությունները, ուժեղ և թույլ կողմերը, բացահայտել կարողությունները և կողմնորոշվել ապագա մասնագիտության ընտրության հարցում։ Այս բաժինը կօգներ ավելի լավ հասկանալ սեփական ցանկություններն ու նպատակները, ինչպես նաև ավելի վստահ լինել մեր որոշումներում։

Добавить комментарий